Հայաստանի Հանրապետության անկախության 33-րդ տարեդարձին նվիրված հանդիսավոր ընդունելություն Հաագայում

10 հոկտեմբերի, 2024

Հոկտեմբերի 10-ին Հաագայում տեղի ունեցավ Հայաստանի Հանրապետության անկախության 33-րդ տարեդարձին նվիրված հանդիսավոր ընդունելություն։

Դեսպան Վիկտոր Բիյագովն իր ելույթում անդրադարձ կատարեց Հայաստանի Հանրապետության անկախության և ինքնիշխանության պահպանման կարևորագույն հենասյուներին՝ ընդգծելով Հայաստանի անշեղ նվիրումը ժողովրդավարական արժեքներին, մարդու իրավունքների պաշտպանությանն ու օրենքի գերակայությանը, ինչպես նաև միջազգային գործընկերների համագործակցության կարևորությունը՝ նախանշված նպատակների իրագործման ճանապարհին։

Այս համատեքստում դեսպանն առանձնահատուկ ընդգծեց Հայաստանի և Նիդերլանդների միջև առկա քաղաքական երկխոսության բարձր մակարդակը, երախտագիտությամբ նշեց Նիդերլանդների կառավարության շարունակական աջակցությունն ու վերջինիս ծրագրում Հայաստանի Հանրապետությանը սատարելու վերաբերյալ անդրադարձը։

Դեսպան Բիյագովն անդրադարձավ նաև անկախացումից ի վեր Հայաստանի Հանրապետության տարբեր ոլորտներում արձանագրած զգալի հաջողություններին ու ձեռքբերումներին՝ ի հեճուկս հատկապես վերջին տարիների պատմական փորձություններին և անվտանգային մարտահրավերներին։

Բարձրաձայնելով Ադրբեջանում պահվող 23 հայ ռազմագերիների և այլ պահվող անձանց խնդիրը՝ դեսպանն ընդգծեց, որ վերջիններիս անհապաղ ազատ արձակումը պետք է լինի միջազգային իրավակարգին հավատարիմ և մարդու իրավունքների և հիմնարար ազատություններիպաշտպանության առաջամարտիկ բոլոր պետությունների հրամայականը։

Անդրադառնալով 2023 թվականի սեպտեմբերին Լեռնային Ղարաբաղում Ադրբեջանի կողմից իրականացված էթնիկ զտմանը՝ դեսպանը նշեց, որ հայկական հետքը Լեռնային Ղարաբաղից վերացնելու Ադրբեջանի սիստեմատիկ քաղաքականության շարունակությունն է հայկական մշակութային ժառանագության և կրոնական արժեքների վերացումն ու պղծումը։ Ի հեճուկս Արդարադատության միջազգային դատարանի պարտադիր իրավաբանական ուժ ունեցող որոշմանը՝ Ադրբեջանը շարունակում է հայկական մշակութային ժառանգության յուրացման և պատմական փաստերի խեղաթյուրման քաղաքականությունը։

Նիդերլանդների արտաքին գործերի նախարարության անունից ելույթով հանդես եկավ Եվրոպայի վարչության տնօրեն Էրիկ Վեստստրատեն՝ վկայակոչելով հայ-նիդերլանդական բազմադարյա բարեկամությունն ու երկկողմ հարաբերությունների ներկայիս հանգրվանը։ Ելույթով վերստին ընդգծվեց Նիդերլանդների կառավարության ծրագրով ամրագրված հանձնառությունը՝ սատարել Հայաստանի Հանրապետությանը ինչպես երկկողմ, այնպես էլ ԵՄ ձևաչափերով։

Երեկոյին ներկա էին Նիդերլանդների կառավարության ներկայացուցիչներ, խորհրդարանի պատգամավորներ, Նիդերլանդներում հավատարմագրված դիվանագիտական կորպուսի մի շարք ներկայացուցիչներ, Հաագայում նստավայր ունեցող միջազգային կազմակերպությունների բազմաթիվ աշխատակիցներ, հայ համայնքի ներկայացուցիչներ և այլ հյուրեր։

Միջոցառումն ուղեկցվեց «Սև կարապ» հնգյակի հայկական ազգային երաժշտության կատարումներով։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր