Դեսպան Բալայանի այցելությունը Ասեն

02 մարտի, 2020

Մարտի 2-ին դեսպան Տիգրան Բալայանը այցելեց Ասեն, ուր՝ Դրենթս թանգարանում «Արարատի կախարդանքի ներքո. Հին Հայաստանի գանձերը» ցուցահանդեսին ընդառաջ առանձին հանդիպումներ ունեցավ Դրենթե նահանգում Թագավորի հանձնակատար (նահանգապետ) Ջետա Կլայնսմայի, Ասենի քաղաքապետ Մարկո Աուտի, Դրենթս թանգարանի տնօրեն Հարի Թուփանի հետ։ Հայաստանի դեսպանի այցելության պատվին Դրենթեի նահանգային իշխանությունների գրասենյակի առջև բարձրացվել էր ՀՀ պետական դրոշը։

Թագավորի հանձնակատարի և Ասենի քաղաքապետի հետ հանդիպումներին դեսպան Բալայանը ներկայացրեց հայ-նիդերլանական հարաբերություններում արձանագրված ձեռքբերումները և ընթացիկ ծրագրերը։ Քննարկվեցին ապրիլի 12-ին նախատեսված ցուցահանդեսի հանդիսավոր բացման արարողությանն առնչվող մի շարք հարցեր, ինչպես նաև ապակենտրոնացված համագործակցության հաստատման հնարավորությունները։

Դրենթս թանգարանի տնօրենի և ղեկավարության հետ հանդիպմանը ամփոփվեցին ցուցահանդեսի նախապատրաստական և կատալոգի հրապարակման աշխատանքները, քննարկվեցին բացման արարողության մանրամասները։

Ասենում Տիգրան Բալայանը հանդիպում ունեցավ քաղաքի խոշորագույն առևտրի կենտրոնի՝ Vanderveen-ի սեփականատերերի հետ, որի արդյունքում պայմանավորվածություն ձեռք բերվեց ցուցահանդեսի վեց ամիսների ընթացքում առևտրի կենտրոնում հայկական արտադրության ապրանքների վաճառք կազմակերպելու, ինչպես նաև կենտրոնի մշակութային սրահներում Հայաստանին նվիրված միջոցառումներ անցկացնելու վերաբերյալ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր