Հայաստանի և Նիդերլանդների արտգործնախարարությունների գլխավոր քարտուղարների հանդիպումը

13 սեպտեմբերի, 2019

Սեպտեմբերի 13-ին ՀՀ ԱԳՆ գլխավոր քարտուղար Վահագն Մելիքյանը Նիդերլանդներ կատարած աշխատանքային այցի շրջանակներում հանդիպում ունեցավ ՆԹ ԱԳՆ գլխավոր քարտուղար Յոկա Բրանդտի հետ:

Հանդիպումը մեկնարկեց ՀՀ և ՆԹ ԱԳ նախարարությունների միջև դիվանագիտական առաքելությունների և հյուպատոսական կետերի աշխատակիցների ընտանիքի անդամների ընդունող երկրում աշխատանքի իրավունքի վերաբերյալ փոխըմբռնման հուշագրի ստորագրմամբ:

Հանդիպմանը Վահագն Մելիքյանը ներկայացրեց 2018 թ. ի վեր Հայաստանում տեղի ունեցող լայնածավալ բարեփոխումների շարունակական ծրագիրը՝ անդրադարձ կատարելով օրենքի գերակայության, կոռուպցիայի դեմ պայքարի, ժողովրդավարական կառույցների ամրապնդմանն ուղղված քայլերին։

Իր հերթին ողջունելով Հայաստանում ժողովրդավարության լիարժեք կայացմանն ուղղված հայկական կողմի ջանքերը՝ տիկին Բրանդտն ընդգծեց հայ-նիդերլանդական երկկողմ հարաբերությունների նկատելի ակտիվացումը և առաջիկայում նախատեսվող բարձրաստիճան հանդիպումների կարևորությունը՝ համարելով դրանք Նիդերլանդների կողմից աջակցության վառ դրսևորում։ Երկուստեք վերահաստատվեց քաղաքական երկխոսության դիմանամիկայի պահպանման և հետագա խորացման պատրաստակամությունը։

Հանդիպմանը կողմերի միջև հանգամանալից քննարկում ծավալվեց ՀՀ և ՆԹ արտաքին գերատեսչությունների կառուցվածքային հարցերի, կիրառվող նորարակական լուծումների, ընթացիկ և նախատեսվող բարեփումների շուրջ։

Հանդիպման ավարտին Հայաստանի ԱԳՆ գլխավոր քարտուղարը Նիդերլանդների գործընկերոջն հրավիրեց Հայաստան։

Այնուհետև Վահագն Մելիքյանը շրջայց կատարեց Նիդերլանդների արտգործնախարարությունում, ծանոթացավ համակարգում ընթացող տեխնոլոգիական բարեփոխումներին և կիրառվող նորարարական լուծումներին, այցելեց ԱԳՆ տեղեկատվական կենտրոն, հանդիպեց ՆԹ ԱԳՆ թվային ծառայության տնօրենի, հաղորդակցության և հանրային դիվանագիտության վարչության պետի հետ։
Վահագն Մելիքյանը հանդիպեց Նիդերլանդների ԱԳՆ Արևելյան գործընկերության հարցերով նորանշանակ հանձնակատար դեսպան Հենկ ֆան դեն Դուլի հետ, որի հետ մտքեր փոխանակվեցին ՀՀ-ԵՄ համագործակցության շուրջ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր